我跟五月天也有個約定

說到五月天…… 很那些年。

那些年喜歡五月天的時候，我十五歲。

大概是看了這樣類似的一段影片……
我覺得他們很了不起，很「型」
於是，開始了我的五月之路。

同學們那時喜歡的是花樣美男F4之類的偶像……
五月天是一個陌生的名字
不知從何年何月開始……
直到三年前我買不到DNA香港演唱會門票的時候，我就知道……「大穫」！

而家真係係愈黎愈多人識五月天
我由2006年佢哋嚟香港開第一次演唱會已經差唔多場場買、場場睇。
不過近呢三兩年真係頂唔順！
先唔好講佢由以前淨係開一場到而家例牌加到三場先啦。
我2006年睇嗰陣，前排門票都係$380。抵到爛！
到上年2011年《就是Rock it!》演唱會，前排門票已經係780。
可悲嘅係……我都係前一晚有盡我所有人際關係人力物力先撲到兩張靚位飛！T^T

一講起上年個《就是Rock it!》演唱會，其實有啲火火哋！
上個post都已經介紹咗之前嘅《DNA》演唱會係有幾好睇架啦
問題嚟喇……《就是Rock it!》基本上係冇任何嘅舞台設計
之前嗰啲變型金剛呀、黃色的士呀、好好睇嘅間場小電影……全部都冇！
佢憑咩收我$780一張飛？！？！？！？！？！
丫……有！
佢哋開場冇耐就上演喺紅館放火燒音箱！

我可以肯定佢係真係放火！
因為我的的確確feel到好熱！
但係……都係唔明點解要收我$780！！！
不過我都係俾得心甘命抵嘅……
五月天演唱會可能係全世界最好睇嘅演唱會！

不過，奉阿蓮籲，睇五月天演唱會最好係同……
１）自己啲老死
２）五月天迷（如果淨係識〈你不是真正的快樂〉同〈突然好想你〉嗰啲唔算架吓！）
你睇五月天演唱會嘅partner需要符合哂以上兩個條件
同佢地一齊去睇至唔會嘥左張飛！
當然，呢兩個條件都係比較難達到嘅……
所以，阿蓮我用咗個比較折衷嘅方法
不斷催眠你啲老死（不論傾電話、唱ｋ、行街、食飯有窿就入、有位就唱……）
佢哋自不然就會上釣！仲萬試萬寧！！！

令我很是覺得蝕底嘅《就是Rock it!》
無奈亦都係我坐得最前嘅一次T^T
最最最嬲嘅都唔係佢收得貴又冇嘢睇、坐得前又冇得搖……
最嬲係……佢竟然冇唱到〈憨人〉
真係好嬲好嬲！好嬲好嬲！好嬲好嬲！


又到三月喇……
係時候出動搶飛喇！
我唔貪心，我淨係想坐返上年咁前就OK架喇！
全能嘅搖滾之神！保佑我！